Namensänderung

 

Hot d' Mirz a Interschrift in Sinn,
so malt s' bloß drei Kreuzln hin.
Und dos ereignt sih dann und wann,
wal s' nit schreibm kann.

Heut sull s' sieder interschreibm,
do loßt s' de krei Kreuzln bleibm,
dafür malt s' drei Ringerln hin
und moant: "Wal ich hiatz gheirat't bin!"

  
 
‚s liabe Geld
D er Michl erwocht in tiafer Nocht,
zwoa Einbrecher hobm an muter gmocht.
Der oane ganz rabiat sih steltt
und schwenkt a Pistuln; "Mir suachan Geld!"
Der Michl ober zittert nit:
"A Geld? Do suach ih mit!" 		 
 
D' Ähnlichkeit
  "Ihr Töchterl hot - ma gsiacht's genau -
viel Ähnlichkeit mit Ihrer Frau."
Und seufzend moant af dos der Mann:
"Bsunders seit's redn kann!" 		 
 
Dos Moped
  Der Mopedfoahrer bleibt gach steckan,
dos Radl geht nit, nit ums Verreckan.
"Verflucht! Hiatz bleibt de Kraxn stehn!"
Der Gfoare mahnt in Vorübergehn:
"Du sullst dih christlicher betrogn
und liaber ‚Mit Gottes Hilfe' sogn."

"Mit Gottes Hilfe" moant der Mann,
und schau! Dos Moped springt drauf an
und saust davon.

Der Gfoare de Bemerkung mocht:
"Verflucht! Dos hätt ich selbm nit docht!" 		 
 
Dos Nochtgebet
  D' Muatter bringt dos Kind ins Bett
und sogt drauf: "Mitzerl, bet hiatz nett:
"Lieber Herrgott, mach mich fromm,
dass ich in den Himmel komm!"

Do loßt d' Mitzerl sih vernehman:
"Ih bin jo kamm erscht oachakemman." 		 
 
Ehrlich
  De guate Tant is af Besuch
und redt grod mitn kloan' Much.
"Wann tuats denn essn?" sie eahm frogt.
"Wannst fort bist, hot d' Muatter gsogt!" 		 
 
Immer besser
  Der Polizist redt af an Autofoahrer ein:
"Zoagn S' ma (r) amol Ihrn Führerschein!"
"Lossn S' mih in Fried!
Ih hob koan' nit!"
Do setzt de Frau d' Interholtung fort:
"Er hot an Rausch, glaubm S´ eahm koan Wort!"
Do muiß dos Töchterl ah wos sogn:
"Mir hobm koan Glück mitn gstohlnan Wogn!" 		 
 
Am Bahnhof
  Afn Bahnsteig stürzt a Mann,
der kaam mehr Atn zuichan kann.
Do pockt'n schier der gache Graus;
der Zug foahrt just intaus.

Frogt oaner:" Hobn S'n nit erreicht?"
"Na, na, ih hob'n bloß verscheucht!" 		 
 
Ban Gr´icht
  Richter: "Ich rechne sicher mit dem Fall,
ich seh Sie hier das letzte Mal."
Der Angeklogte moant verdrossn:
"Jo, wulln Sie sih versetzn lossn?"